جۆرج بوش سه‌رۆكی ئه‌مریكا و نوری مالكی سه‌رۆك وه‌زیرانی عیراق، ئێواره‌ی دوێنێ 22/8 له‌ڕێی ڤیدیۆ كۆنفراسێكه‌وه‌ دانووسانه‌كانی رێككه‌وتننامه‌ ئه‌منییه‌كه‌ی نێوان عیراق- ئه‌مریكا و دۆسیه‌ی كشانه‌وه‌ی هێزه‌كانی ئه‌مریكا له‌عیراقیان تا كۆتایی ساڵی 2011 تاووتوێكرد.
گۆردن جۆندرۆ وته‌بێژی ره‌سمی كۆشكی سپی له‌لێدوانێكی رۆژنامه‌وانیدا له‌ ویلایه‌تی ته‌كساس رایگه‌یاند: سه‌رۆك بۆش و نوری مالكی گفتووگۆیه‌كی نوێیان له‌باره‌ی رێككه‌وتنه‌كه‌وه‌ كردووه‌، هه‌ردوو تیمی عیراقی و ئه‌مریكی به‌رده‌وامن له‌سه‌ر دانووسانه‌كان، له‌و بڕوایه‌شدام كه‌دانووسانه‌كان ئاكامی باشیان ده‌بێت، به‌ڵام هێشتا ورده‌كاریی زۆر هه‌ن كه‌ مامه‌ڵه‌یان له‌گه‌ڵدا بكه‌ین.
وتیشی:پێشكه‌وتنی بارودۆخی ئه‌منی له‌عیراق رۆڵێكی گرنگی هه‌بوو له‌سه‌ر پێشنیاركردنی كشانه‌وه‌ی هێزه‌كانی ئه‌مریكا، ئاماژه‌ی به‌وه‌شدا كه‌ دانووسانه‌كان هێشتا به‌رده‌وامن، كۆتایشی پێنایه‌ت تا  به‌ ئاكامێك نه‌گات.