نیوه‌ڕۆی ئه‌مڕۆ 7/11 مام جه‌لال سه‌رۆك كۆماری عیراق له‌باره‌گای تایبه‌تی خۆی له‌به‌غدا پێشوازیكرد له‌ رایان كرۆكه‌ر باڵیۆزی ئه‌مریكا له‌عیراق و باڵیۆز دیڤد ساترفێڵدو میگان ئۆسیلڤان و ژماره‌یه‌كی تر له‌كارمه‌ندانی باڵیۆزخانه‌ی ئه‌مریكا.
له‌دیدارێكدا دوا گۆڕانكارییه‌كانی عیراق له‌سه‌رووی هه‌مووشیانه‌وه‌ رێڕه‌وی دانوستان و گفتوگۆكانی تایبه‌ت به‌ڕێككه‌وتننامه‌ی كشانه‌وه‌ی هێزه‌كانی ئه‌مریكا له‌عیراق له‌نێوان عیراق و ئه‌مریكا تاووتوێكران به‌تایبه‌ت پاش ئه‌وه‌ی كه‌حكومه‌تی ئه‌مریكا وه‌ڵامی هه‌مواركردنه‌كانی عیراقی داوه‌ته‌وه‌، له‌و چوار چێوه‌یه‌دا سه‌رۆك تاڵه‌بانی و باڵیۆزی ئه‌مریكا پێداگرییان له‌سه‌ر گرنگی رێككه‌وتننامه‌كه‌ بۆ رێكخستن و فراوانكردنی ئاسۆی پێويست له‌به‌رده‌م په‌یوه‌ندییه‌ ستراتیژییه‌كانی نێوان هه‌ردوو وڵات و پێویستی په‌ره‌پێدانی ئه‌و په‌یوه‌ندییانه‌ به‌شێویه‌ك كه‌گره‌نتی سه‌روه‌ری نیشتمانی و به‌رژوه‌ندی هاوبه‌شی هه‌ردوولا بكات، كرده‌وه‌.
هه‌مواركردنی یاسای هه‌ڵبژاردنی پارێزگاكانیش یه‌كێكی تربوو له‌و ته‌وه‌رانه‌ی كه‌ له‌دیداره‌كه‌دا گفتوگۆی له‌سه‌ركرا، له‌و باره‌یه‌وه‌ سه‌رۆك تاڵه‌بانی ئاماژه‌ی به‌پێویستی گه‌یشتنه‌ رێككه‌وتنێك كرد كه‌مافی كه‌مینه‌كان بپارێزێت.
له‌لایه‌ن خۆیه‌وه‌ كرۆكه‌ر به‌رده‌وامی پشتگیری وڵاته‌كه‌ی بۆ پرۆسه‌ی سیاسی و رێڕه‌وی دیموكراسی له‌عیراق دووپاتكرده‌وه‌و هه‌ڵوێسته‌ حه‌كیمه‌كانی سه‌رۆك تاڵه‌بانیشی له‌بنیاتنانی عیراقێكی نوێ و چه‌سپاندنی یه‌كێتی نیشتمانی و به‌شداریپێكردنی سه‌رجه‌م پێكهاته‌ سیاسییه‌كان و بێبه‌شنه‌كردنی هیچ پێكهاته‌یه‌كی عیراقی له‌مافه‌كانی، به‌رزنرخاند.
له‌دیداره‌كه‌دا د.له‌تیف ره‌شید وه‌زیری سه‌رچاوه‌كانی ئاوو نزار محه‌مه‌د سه‌عید به‌ڕێوه‌به‌ری نوسینگه‌ی تایبه‌تی سه‌رۆك كۆمار ئاماده‌بوو.